Մարիր լույսը մշուշոտ,
Սև հուսերդ արձակիր,
Դու իմ դահիճ, դու իմ քույր,
Դու իմ ընկեր տարագիր,
Էլ մի՛ կրկնիր, մոռացի՛ր
Խոսքերն անմիտ ու պատիր, -
Լուռ տանջանքով, խավարով
Փայփայիր ու փարատիր...
Փարվի՛ր, փարվի՛ր ինձ ամուր,
Մեղսոտ սիրով սիրիր ինձ, -
Մեխիր սուրդ կուրծքս բաց,
Թող թույն լինի և թախիծ։
Արդեն գիշեր, արդեն մութ,
Անանց խավար է արդեն, -
Եղիր հզոր ու անգութ,
Չար ժպիտով ել իմ դեմ...
Երգի՛ր խավար և անկում,
Ինձ տանջի՛ր և ամոքի՛ր, -
Այրի՛ր սիրտս, թող լինի
Այնտեղ ավեր ու մոխիր։
Ցուրտ համբույրով համբուրի՛ր,
Այրիր բոցով նրա ցուրտ -
Վերջին սիրով անպատիր,
Անվախճան ու անհագուրդ...
Իմ ցավագին աղոթքին
Ունկնդրի՛ր ու երևա՛,
Քո հաղթության ու սիրո
Կնիքը դիր իմ վրա...