Մաշվա՜ծ գրքեր, մաշվա՜ծ գրքեր,
Գրքեր դեղնա՜ծ ու անշո՜ւք:
Որքա՜ն մտքեր, որքա՜ն կրքեր
Եվ ընկերնե՜ր ունեք դուք:
Ո՞վ իմանա՝ լուռ ու անքուն
Ո՞ւմ եք վառել, ո՛ւմ գերել,
Եվ քանիսի՛ սրտին, հոգուն
Վիշտ ու ժպիտ եք բերել:
Բարա՜կ, տանջվա՜ծ ձեր թերթերին
Ո՞վ է արցունքն իր թողել,
Ո՞վ է գրել ձեր էջերին
Երախտիքի ջերմ տողեր:
Գրքեր, երնե՜կ լինեմ ձեզ պես՝
Օգնե՛մ, հոգնե՛մ օր-օրին,
Միայն հոգուս գանձերն ամբողջ
Տամ բոլորի՜ն, բոլորի՜ն: