Սիրելի հերոս Ս.Գ. Զաքիյանի
անմահ հիշատակին
Հերոսական ընկերներով միասին
Կայծակի պես դու շանթեցիր թշնամուն,
Իդեալների վեհ դրոշը քո ձեռքին,
Քաջի մահով ընկար պատվի սուրբ դաշտում:
Քո սիրելի հայրենիքում նորազատ,
Որ քեզ տվեց դյուցազնի կամք ու կորով,
Ամեն մի սիրտ մորմոքում է քեզ համար,
Եվ գլուխներն խոնարհում են հարգանքով:
Քո ճակատը` հաղթանակով պսակված,
Մեր պատմության մեջ քայլում ես դու փառքով.
Եվ ահա՛ մեր ճակատները խոնարհած
Գործիդ հանդեպ բարձրանում են պարծանքով:
Մեր ցասումը, մեր վրեժը, ո՛վ հերոս,
Քո երկաթե բազուկիդ մեջ դու տարար,
Եվ զարկեցիր նենգ թշնամուդ բարբարոս,
Ոսոխի դեմ դարձար վահան ու պատվար:
Քե՛զ հավերժ փառք... հանգչի՛ր խաղաղ ու անդորր.
Նոր հերոսներ կկայծակեն քո հետքով.
Հայաստանը կբողբոջի նորից նոր,
Կզարդարե քո շիրիմը վարդերով: