Արամայիս Սահակյան

ԳՆԴԱԿԸ ՍՐՏՈՒՄ

Հր. Հովհաննիսյանին
Քո մեջ, կռվի տարիներից,
Մի գնդակ կա թշնամական:
Այդ գնդակը հուզում է ինձ,
Ինչպես հողում դրված ական:
 
Թե սիրային երգ գրելիս,
Թե խոսելիս, թե երգելիս,
Ես տեսնում եմ այդ գնդակը՝
Քո սրտի մեջ վերք գրելիս:
 
Ես չեմ եղել պատերազմում,
Բայց տեսել եմ հազար անգամ,
Թե ինչպես են իմ դեմ սուրում
Գնդակները մեր գրական...
 
Այո, կյանքը պայքար է մեծ,
Ուստի միշտ էլ զինվոր ենք մենք: -
Մի գնդակ կա քո սրտի մեջ,
Իմ սրտի մեջ՝ հազար ու մեկ...

Яндекс.Метрика